我老母果頭嘅親戚都稱我姑爺仔，老竇果頭啲人都叫我三少爺。睇得無線多咗真係好憎呢兩個稱呼，因為啲奸人，出賣家産，敗家少爺都喺以上兩個Titles。但係冇計，我世襲咗我老竇嘅稱呼，就算係獨生都冇得走雞。但唔係個個都好似我咁憎繼承，好似金一肥，二肥，三肥就一定要千秋萬代，而埃及木瓜拉客都要個仔假賣啦嚟做法老，澳門賭王啲姨太太爭家産更係畀任何港劇仲勁。
不過有啲繼承喺好奇怪，今日我公著件唐裝衫去會館吃飯表示傳統，作為粵人好明顯係唔知道自己著緊嘅係馬褂唔係華服，更加無知庚寅之劫，廣州屠城剃頭易服。外公同我表弟講咗幾句四邑話，表弟話佢唔understand，外公話鄉下話都要識返幾句。我心中偷笑，你教育我舅父都用普通話，我表弟喺花旗出世但個名叫愛華gay到冇得再gay，你從嚟就要求普語教育佢，要佢搵個撈妹做老婆顯得有文化，連粵語都講唔倒幾句仲點識鄉下話？我真係佩服我外公放棄粵人身份嘅滑稽行為，睇嚟喺佢有生之年我要送張尚可喜紀念館門票畀佢。
