老鄧上臺搞改革，大把人睇好托洛斯基民主化，六四一開搶就開細唔開大。30年嘅經濟跳躍同港澳殖民易主，又一大班人買資產階級自由化有昇冇跌，點知和諧社會就只見熊就不見牛，網絡2.0喺中國就永遠概念股，水泡爆完一個又一個，唔知幾多民運維權人士大閘蟹，畀溫影帝呃到要燒炭跳樓。呢期投資艾鬍鬚藝術品，買茉莉花期貨嘅人必定損手損腳。
今有人向我推銷未來中國10年民主債券，認為世界各國現時都有大量中國留學生，佢哋學成歸國必定引領潮流，推動改革。想唔到而家仲有人賣雷曼債券，自79年以嚟就有大量人才回流中國，留學生更係一批多過一批。可惜呢啲人在外所求之學乃西方嘅帝王學同原始資本學，意在學習專權獨裁之短而防民生民主民權之長。在外洋生活可以體驗到開明體制約束政府獅子嘅籠子，固回到中國必防範有人起呢個籠子，就同金正恩浸咗幾多洋水都會係大獨裁者一樣。當然留洋者並非個個都係權貴子弟，但可惜有機會出洋嘅人大都只係想提高身價，好待將來受重金禮聘返中國做獨裁嘅士大夫。現今嘅留洋子弟比其前輩更加猖狂刁橫，上一代因國力積弱仲係比較收斂，而新一代就係揸跑車左擁右抱靚模，開口埋口就係我國持有你哋幾多國債，窮鄉僻壤唔係老竇叫睇住銀行戶口我真係唔嚟，呢班人如有改革相我就真係切乜都得。
ps.我曾有做零售嘅朋友畀撈頭留洋者用錢掟面，話可以賣起佢成間店，叫佢收皮。但朋友話佢冇認真聽個撈頭解釋點解鬧佢，因為個撈仔條女對ball太吸引..............
