Sunday, November 18, 2012

台妹

我哋呢代粵人好幸福,可以見證粵語滅亡。呢個真係千載一遇,緊次某啲原始人睇住恐龍絕種,又或啲異教徒睇住耶穌釘十字架。中原撈頭科學發展觀話畀我哋知,語言只會越嚟越少,人係唔會為咗溝通而學習多種語言,亦無時間學習。果啲能講多種語言嘅海外華僑係稀有品種,我喺唐人街偶爾見到呢啲珍貴動物真係想將佢哋當熊貓噉關起身研究。上個星期去飲,同台與一台妹傾計,此人上三代都喺台灣務農,先祖嚟自梧州。呢個並不屬於走難派嘅粵人台妹講一口流利白話,多虧家族夠大,有人陪佢喺屋企講返兩句。我笑佢要搵返個粵人老公,到時可以返大陸畀人研究下啲講落後語言嘅人種。